修改設計致延遲工程

霍震寰入鄉隨俗，同科大校長陳繁昌齊齊行去工程地盤前切燒豬。呢幢大樓預計明年十二月落成，距離研究院○七年嘅奠基儀式，足足隔咗三年咁耐。曾經有報道話霍家後人事事問回報，致大樓只聞樓梯響，令工程延誤，研究院依家都係租用南沙資訊科技園嘅地方做研究。對於呢一個講法，霍震寰就唔認同，反駁話研究院一直有做研究工作，而大樓嘅設計需要修改，至會延遲工程。

霍老生前落重本發展南沙，霍震寰話嚟緊將會加碼，打算投資五十至六十億元人民幣，包括興建遊艇會俱樂部，首期工程年底前就會完工，配合今年年尾喺廣州舉行嘅亞運會。霍家仲會畀錢開設來往南沙至澳門嘅航線，月底就開通。重頭戲當然唔少得霍家喺南沙嘅地產項目啦，佢話打算明年開賣添！