究竟係近朱者赤、近墨者黑，抑或係上樑不正下樑歪？就連政制及內地事務局局長「林公公」林瑞麟亦突然為佢「公公」呢個花名有好大反應，仲大反擊嚟捍衞自己嘅「真身」。

其實，立法會議員鬧佢係「林公公」已經習以為常，但尋日喺立法會大會上，林公公回應有關起錨騷開支嘅質詢時，社民連嘅「大舊」陳偉業發難，鬧阻住政制發展就係林公公呢啲閹人去扭曲……都未講完，林公公就撲起身同立法會主席講，話呢句說話帶有侮辱性，而主席亦裁決係有咁嘅成分，要求大舊收番呢句說話。

大舊唔服，仲翻舊帳話上個禮拜都有咁叫林公公㗎啦，點解又冇話帶有侮辱性呢？喺咁嘅形勢下，睇怕再講落去又可以引起另一場辯論，主席就對大舊講，叫佢先收回句說話，喺完會後先再同佢解釋。雖然講到咁，但大舊依然唔肯罷休，追問主席係咪會將個解釋話晒畀全體議員知？

立會主席懵盛盛

但唔知點解，之後好似冇咗件事咁，直至工聯會嘅黃國健主動同主席講，話大舊仲未收番句說話喎，主席先如夢初醒咁叫大舊收回。可能見冇得再側側膊，大舊好唔情願咁話暫時收番句說話，否則對太監好唔公道。大舊都算搞嘢，臨尾都唔放過林公公，轉句說話鬧多次。

若果林公公以為呢次發難奏效，睇嚟就開心得太早嘞！事關其後喺辯論政制嘅動議上，大舊唔點名咁接連拋出「對於有啲好似公公、閹人、走狗……」，在座嘅議員都知道佢講緊邊個，就因為大舊冇點名，林公公想投訴亦出師無名，惟有硬食囉！