小白觀點:隨時搞到人類滅亡

喬布斯又出招公布iPhone四代，佢老哥對呢部新機好有信心，話用過之後，舊嗰部連掂都唔想掂。講開又講，睇見喬布斯瘦到成條柴咁，又係一套招牌黑恤衫同牛仔褲，依然咁有魅力，行出嚟仲Sexy過一大班拋晒胸趷晒籮嘅Game模，真係唔到你唔服，如果搵佢嚟做特首，香港普唔普選都冇所謂啦。

不過，小白老弟至今都未轉用iPhone，因為我覺得呢部嘢都幾邪惡，隨時會搞到人類滅亡㗎。你睇吓依家啲口靚仔坐隔籬位這麼近那麼遠，竟然都要靠iPhone通訊，久而久之喪失語言能力事小，用手指捽呀捽，鐵柱都可以磨成針啦，長年累月咁摩擦，食指好快磨短磨甩都有之。仲有喎，我深信好快有人寫啲敦倫Apps，到時老公只要係咁篤個芒，跟住老婆部iPhone震一震即可完事，隔多十個月，上台拎部新iPhone 5當生咗仔。咁嘅世界，你活埋我嗰份嘞。

Blog:http://sunsiupak.blogspot.com

阿豪觀點:追逐無涯任務艱巨

蘋果宣布推出iPhone第四代，例必又係由高層出嚟賣花讚花香猛Sell一輪，佢哋嘅總裁喬布斯話喎：「當你試過新電話，你不會想用回舊版。」

講到咁誇張，堅定流呀？即係咁，豪伯對科技嘅嘢，始終都係好欽敬嘅，套用莊子嘅說話：「以有涯隨無涯，殆矣；已而為知者，殆而已矣！」追逐無涯呢啲咁艱巨嘅任務，都係交畀小白兄啦，我借嚟玩吓得㗎喇！

唔知點解，每次推出高新科技產品，都令豪伯諗起《龍虎門》，裏面嘅主角都係打餐懵之後先至出絕招殺敵，每次睇到呢度，我都會忍唔住「唓」一聲：「一早出絕招，之前就唔使搞咁多無謂嘢啦！」而且我估，iPhone第四代都未必係絕招嚟！

同樣道理，如果一間工廠可以接連大幅加薪幾次，而仍然可以面不紅氣不喘，咁佢哋之前咪即係……

Blog:http://lukchiho.blogspot.com

網友觀點

多　哥：iPhone 4功能多、用途多，最邪就係死得人多。

老　趙：舊款機將以跳樓價清貨，到時又可以執平貨！

小　山：好多人用緊山寨版第四代啦，乜正版咁執輸㗎！

喬老C：只係第三代嘅改良版啫，冇乜特別吖！