本報記者日前巡視咗多間圖書館，請專家用儀器檢測室內空氣質素，發現圖書館自修室空氣質素勁惡劣，二氧化碳同可吸入懸浮粒子含量都嚴重超標，有啲仲超標將近三倍，唔怪得喺裏面溫書嘅學生都昏昏欲睡啦。

正如有傳染病專科醫生話齋，室內二氧化碳濃度太高會令人疲倦，仲會加速感冒、肺癆等傳染病擴散，而可吸入懸浮粒子超標，會令人呼吸系統敏感，咳嗽、頭痛、哮喘，長期吸入可能會引發肺癌添。

更得人驚嘅係，康文署轄下七十幾間圖書館，只有七間獲環保署簽發空氣質素合格證書，即係話九成以上圖書館空氣質素都唔合格。

政府一味吹水唔抹嘴，話要重現藍天白雲，可惜都係大隻講，講嚟講去，唔見藍天白雲不特止，空氣質素仲愈嚟愈惡劣添。環保署早排公布粵港珠三角空氣質素調查結果，本港空氣臭氧含量比○六年上升咗一成七。

有人可能會話，室外空氣差啫，唔出街咪得咯，學魯迅話齋，「躲進小樓成一統，管他冬夏與春秋」。如果你真係咁諗，你就大錯特錯嘞，呢嗱，連圖書館自修室都變咗毒氣室，仲有邊度係安全o架？

港府不嬲姓「賴」，路邊空氣質素差，就話係內地工廠排出嘅廢氣，依家連康文署圖書館都烏煙瘴氣，又賴邊個呀？實際上，各界一早就呼籲立例監管室內場所空氣質素，但係政府左耳入右耳出。專家踢爆，室內空氣本來可以控制，問題係政府唔肯做嘢，如果政府有心改善，港人壽命都會長幾年啦。

圖書館變咗毒氣室，康文署唔嗲唔吊，連環保署亦闊佬懶理。問佢哋點解唔管制室內場所嘅空氣質素，佢哋就話一直以「自願」形式管理，又話機電署會為政府嘅冷氣系統維修保養喎，答非所問，簡直九唔搭八。

講開又講，康文署做嘢不嬲都懶懶閒，對圖書館嘅管理係咁，對兒童遊樂場亦係咁。本報曾經踢爆，好多兒童遊樂場嘅設施都冇定時消毒，隨時會爆發傳染病，尤其最近手足口病殺到，更加唔講得笑。

香港近年多災多難，各種疫症輪流侵襲，搞到香港人雞毛鴨血，永無寧日，講到尾，都係同環境衞生欠佳、空氣質素惡劣有關，再咁落去，香港遲早拋錨。叮！