小白觀點:迴龍大格局有史為證

國家文化部證實正研究係咪把風水列入國家級非物質文化遺產，真係唔知好事定壞事。依家啲風水師一蟹不如一蟹，「尋龍點穴」唔係好識，淨係專攻一招「i銀打洞」，搞到風水師等同於「神棍」代名詞，連哨牙通都唔肯認自己係風水師你就知。

為咗掃除大家對風水呢門高深學問嘅成見，小白誠意推薦一篇文章《環球迴龍大格局底定　八方天馬迎紫氣東來—從「東方神秘學」看世界一盤棋》（http://home.on.cc/commentary2001/index.html），深入淺出講晒中國風水學嘅奧義，當中最重要就係要「覓龍」，當迴龍蟠盤地球，龍首探伸嘅地方自然生機勃發；龍腹掃過就興旺發達；至於畀龍尾揩到嘅地方，唔使講，實聽冇運行都得。讀完呢幾篇文章之後，證諸於歷史，擔保大家拍案叫好，自己參透全球風水大格局，總好過畀啲連羅庚都唔識睇嘅人老點，係咪？

Blog:http://sunsiupak.blogspot.com

阿豪觀點:港風水人才好渴市

內地準備將風水列入國家級非物質文化遺產，弘揚中國文化當然真係好事啦，但係有一個問題喎：到底所謂「風水」係乜嘢呢？到底有冇一套好客觀嘅標準先？

不過咁都好嘅，話唔定可以將佢標準化同制式化，咁嘅話，大學就可以開一門風水專科。呢科畢業嘅專才，相信一定好搶手，起碼香港對呢啲人才就好渴市嘞。

你知啦，香港近年咁多風水官司，啲法官一個二個讀番書大嘅，點會了解我國咁博大精深嘅文化呀？夾硬審，咪盞得啖笑？

仲有呀，隨住風水申遺，各種相關產品肯定會應運而生，到時又可以產生一大批「國家免檢」嘅品牌。

諗落都幾好呀，例如「生神仙牌」奶粉，叫各位寶寶子時喺東位先至好開奶飲，就算未必含有DHA令到個BB三個月大就識得計微積分，起碼都唔會因為咁樣食出個大頭腎石娃娃呀！

Blog:http://lukchiho.blogspot.com

網友觀點

哨牙公：挖洞種生機種出遺產咁有創意，國家應考慮列入。

甘仔：咁空泛！啲邪門風水隨時都有可能包括埋喎。

小賓：風水呢家嘢連國家都認同，唔怪得啲風水佬咁發啦！

阿水：中國嘅風水研究歷史悠久，好值得尊重。