駐港已經三年零九個月嘅日本駐港總領事佐藤重和近日收到東京嘅指令，要返回日本老家，尋日佢特登寫咗封信畀傳媒，算係告別，佐藤透露，佢自己當正香港係第二個家，仲學埋地道廣東話，所以佢已經係半個香港人嘞。
講番香港嘅生活，佐藤都對香港生活節奏快有同感，行步路慢啲都會畀人鬧，香港街道有時幾逼幾嘈，甚至電梯都比東京快，佢仲好客氣咁話，香港人嘅勤力、創意，重視公平同誠實，都令佢好欣賞。
數任內難忘事，佐藤話其中一件係爭取恢復日本和牛輸港。香港人或者忘記咗，幾年前瘋牛症肆虐，香港曾禁止日本和牛入口，禁足五年。為挽回港人食日本牛肉信心，佐藤○八年喺山頂官邸大搞和牛宴，成為城中佳話。如今各大食肆都有和牛歎，睇怕都要多謝聲佐藤先生嘞！