大學之間嘅競爭好激烈，好似香港大學同中文大學咁，鬥排名、鬥收生，連港鐵「大學站」個名都爭過一輪。近日中大鬧出拒絕學生要求永久擺放新民主女神像嘅風波，搞到中大管理層頭都大埋，問到港大校長徐立之點睇，佢話唔評論其他院校嘅事情。但就話港大好包容，唔會阻止學生任何活動，徐校長呢番說話雖然冇講對手，但都畀人點火嘅感覺！
中大以「政治中立」為由拒容民主女神像，畀學生組織鬧爆，徐校長尋日就指，大學唔應該有政治立場，但亦應包容異見，又話港大同師生一直緊密溝通，學生任何活動都唔會阻止，但港大地方細，接收新民主女神像就唔會嘞，句句同中大喺今次風波嘅做法「相映成趣」，中大校長劉遵義聽到唔知有乜感覺呢？
其實九七年時，港大同樣發生過國殤之柱深夜運送入校園被阻嘅風波，當時徐立之仲未執掌港大，所以今次雖然婉轉評論大學對待學生要求嘅事，但都好口響，事不關己，真係瀟灑啲嘅。