政府總部（CGO）最近有單不為人道嘅大事，事關政府總部西座鹹水沖廁系統出故障，搞到有「部長樓」之稱嘅局長辦公大樓廁所要有限度開放，局長們會唔會冇得辦「大」事？冇人具體說明，不過，大家齊齊「起錨」外出都不失為解決嘅辦法。
CGO西座所有廁所最近貼出通告，通知用戶廁所沖水喺非辦公時間內要暫停供應，因為老化咗嘅鹹水管上月廿二日勁爆，搞到西座嘅廁所受影響，必須「有限度開放」嚟維修鹹水管。有關安排係：廁所喺六點後冇水沖廁，七點後仲連中央抽氣扇都閂埋，有挑燈夜戰習慣嘅CGO中人點算呢？
喺部長樓返工嘅人有教育局局長孫明揚、發展局局長林鄭月娥同財經事務及庫務局局長陳家強等，仲有佢哋嘅副局長同政治助理。官多之外，立法會議員亦多，因為西座另一翼係立法會議員辦事處嘅集中地，咁多達官貴人有如廁煩惱，最慘仲係可能仲要半個月才搞得掂，睇嚟，一班高官都要繼續上街避難至得。