四年一度嘅世界盃即將開鑼，好多球迷都訂好機票、酒店飛過南非親身直擊，足總董事余錦基今年就留守香港，直到十六強先飛過去，點解？因為余家第一個寶貝乖孫本月出世，第一次做爺爺嘅基哥梗係要留港見證，所以連世界盃開幕都犧牲埋。
基哥雖然係球迷，但佢嘅細仔仲行第一次做老竇就一索得男，做阿爺嘅咪決定留港迎接乖孫到來囉。基哥嘅新抱係全國政協鄭明明嘅千金陳維黛，近排已經有唔少內地政協朋友打電話恭喜佢，基哥多謝大家咁有心之外，仲透露佢負責幫乖孫改中文名，佢希望改一個有關做人宗旨意思嘅名，加上又要諗下送咩特別禮物畀粒乖孫，所以各方面都要絞盡腦汁。
忙完一排之後，佢就會飛去南非睇世界盃十六強，之後仲會去開普敦遊覽有濃厚英國特色嘅風景同靚海岸，最後就去葡萄園歎靚紅酒。