港台關係雖然開始融冰，但台灣陸委會主委賴幸媛前晚首次以現任官職訪港，仲話此行係「登陸入港」，不過，佢雖然係首個台灣部會首長赴港嘅人，但消息就捱到尋日先曝光，港府對呢位主理港台關係嘅台灣要員訪港又無聲無氣，係咪奇怪呢？會唔會同賴幸媛請港府食檸檬有關？
我哋打電話問港府有冇官式接待賴幸媛，政制及內地事務局發言人話，誠意歡迎賴幸媛來港，亦為佢出入境做咗安排，佢哋曾經建議安排特區主管涉台事務嘅主要官員會晤，但台方話今次來港純粹係了解台灣在港機構嘅運作情況，行程緊迫，未能同特區官員會面。
原來賴幸媛畀咗個大檸檬畀港府食！咁佢忙乜呢？據悉，賴幸媛係視察中華旅行社嘅業務，今日就會離港。賴幸媛仲話，過去台港官方互動相當冷淡、限制好多，台方覺得呢方面好多問題要解決咁話。