英皇集團旗下嘅英皇鐘錶係百達翡麗（Patek Philippe，簡稱PP）喺香港最大嘅零售商，彼此合作超過四十年，有手錶界勞斯萊斯之稱嘅PP新款登陸，英皇梗係快人一步攞到靚錶啦，尋日率先展示畀城中富商名流欣賞。英皇集團主席楊受成尋晚仲榮登「PP王」，手上戴住抵港不到兩個禮拜、價值逾一百六十萬元嘅PP名錶。
呢隻「5971PT」預訂咗幾年，個幾禮拜前抵港。隻錶前年先至面世，依家已升值至三百萬元，即係話，楊生一戴呢隻錶已淨袋逾百萬元，認真Lucky。升值潛力咁驚人，楊生一於醒埋老友，今年三月訂咗最新款嘅「5396G」PP錶，送畀新世界發展主席鄭裕彤，彤叔已經戴緊嘞。據悉，「5396G」係白金錶殼，配上鱷魚皮錶帶，盛惠三十二萬元，暫時全港只得彤叔嗰一隻。
楊生千金兼英皇鐘錶珠寶董事總經理楊諾思（Cindy）都畀PP迷住，招呼貴賓之餘，亦透露家中珍藏咗六隻PP，尋日佢戴咗隻價值逾二十萬元、鑲滿鑽石嘅PP女裝錶，盡顯貴氣。佢喺現場仲睇中一款屬PP首隻女裝計時秒錶「7071R」，價值六十一萬一千元。佢話近排好多貴客已打電話去英皇搶先預訂熱門新款。
楊受成太太陸小曼都戴住隻鑲滿珍貴綠寶石嘅PP錶，據講已經戴咗十幾年。細仔楊政龍就謙稱未儲夠錢買PP，平日愛戴已故爺爺留低嘅白金勞力士手錶，因為好有紀念價值，PP佢就會攞爸爸嘅嚟戴。