本文重點
立法會尋日開大會，議員質詢嘅其中一個焦點，係早排有瑜伽中心突然倒閉，苦主透過信用卡分期支付、但未到期嘅錢可唔可以退番。白鴿黨嘅「高達」李永達對財經事務及庫務局局長陳家強嘅回應好不滿，愈講愈嬲，好似化身潮州怒漢咁，運輸及房屋局局長Eva鄭汝樺見佢咁火，靜雞雞送咗張卡同菊花茶包畀佢，本來想勸佢唔好咁躁，點知高達卻將怒氣轉到佢身上，連數佢政策局嘅衰嘢，誓要清算Eva。
菊花茶包救唔到火
高達收咗Eva嘅小禮物後，轉過頭就同記者講件事，問到Eva寫咗啲咩畀佢，佢笑笑口咁話係「秘密」，但就話一個菊花茶包絕對救唔到火，亦唔可以令佢收口喎。佢跟住力數Eva個政策局近期唔少衰嘢，譬如「九招十二式」咁鬼屎，天匯問題又未交代，實有排鬧；愈講愈慶，仲鬧埋運房局個電話長期冇人聽，經常飛咗去個電話錄音，埋怨Eva唔肯畀個手機電話號碼佢，搞到佢長期食閉門羹。
Eva本來想做和事老，幫傻強逃脫高達嘅魔爪，點知反而惹禍上身，依家高達將一腔怒氣轉移晒去運房局，Eva真係送多幾個菊花茶包都唔掂。