本港旅遊界近期好多污點新聞，早前中區鬧市有英國女遊客畀老鼠咬傷，真係醜死人。尋日工聯會議員王國興批評政府冇部門同各區區議會交代地區衞生情況，搞到鼠患日生，佢仲唔知係羨慕定揶揄梁美芬，話事件令滅鼠有功嘅梁美芬一炮而紅。
梁美芬話，自己當初都係想為地區做嘢，誤打誤撞先做咗「鼠王芬」，本來打算洗甩花名之時，點知中環又再出現鼠蹤，佢都忍唔住要加句聲、再跟進吓。
佢仲話，根據之前處理油尖旺鼠患嘅經驗，老鼠繁殖同政府官僚作風以及整體公共衞生政策有關，依家「老鼠也移民」，由旺角去觀塘、再行隧道去埋中環。講到成個老鼠專家咁，梁美芬睇嚟洗唔甩「鼠王芬」個花名嘞。
