煲呔曾單挑公文袋余若薇嘅辯論，雙方早排拗咗一輪點樣舉行，尋日終於達成共識，揀定今個月十七號（禮拜四）下晝六點三十五分至七點半舉行。政圈傳言，近排余若薇搏命做準備，仲獲得「搞事四人幫」成員之二嘅「李漢奸」李柱銘同「民主阿婆」陳方安生出山做軍師，佢哋仲同有公文袋「幕後教父」稱號嘅資深大律師張健利組成最高智囊，誓要幫手砌低煲呔曾。
呢次辯論揀定喺中區政府合署舉行，主持係資深傳媒人吳明林，特首辦讓咗一小步，就係容許事先收集市民書面或錄音提問，由二人即場抽籤回答，臨場考急才。問到余若薇有乜準備，佢話唔使做面部深層護膚，亦冇請人訓練，只係搵公文袋秘書長陳家洛扮煲呔曾做過模擬辯論。
不過，消息話，余若薇收到煲呔曾封戰書後，即刻打咗三個電話，分別畀李漢奸、民主阿婆同張健利，請教應唔應該應戰、應該點樣安排等，聽過三人教路先安心回覆煲呔曾。余若薇冇否認聯絡過三人，又話如果佢哋有好意見，唔使佢搵上門，佢哋都會主動相告。
李漢奸、民主阿婆同「淫賤黎」黎智英，一向鍾意喺政壇搞幕後操控，興波作浪，呢個「搞事三人組」，每逢香港有大嘅政治事件，都喺幕後發功，司馬昭之心，路人皆知，尤其係李漢奸，雖然身為白鴿黨創黨主席，但近年每到關鍵時刻，必明撐暗扶公文袋，甚至不惜「賣黨」，今次唔叉隻腳埋嚟咪好寂寞？