自從政府幾日前拋出「起錨」口號後，問責官員就好似集體變身水兵咁，做乜都掛住「起錨」，尋日林公公向立法會交代五區補選嘅開支，近一億六千萬元開支嘅具體項目暫未有，但就首次披露補選涉及嘅人力資源。

港人隨時被玩多鑊

原來為咗籌備五區補選，政府特別增設咗二十個有時限嘅公務員職位，又招聘超過二百六十名非公務員合約僱員；投票當日，仲搵咗一萬四千六百名公務員擔任選舉事務人員，負責喺票站做協助投票或點票工作，此外又要四千二百個警務人員喺唔同嘅票站同附近維持秩序或負責駐站工作。

議員一聽補選咁大手筆，激氣之餘又驚再畀人玩，紛紛要求政府快啲修例杜絕漏洞，但林公公就話現階段要搞咗政改方案先，跟住再修補選例。早前參加五區總辭嘅社民連長毛同「大舊」陳偉業趁機發難，數番當年老董腳痛辭職，搞到香港要補選特首，甚至特首辦搵陳岳鵬跳槽，都令到南區區議會出缺、補選嘅例子，質疑政府都搞出唔少補選事端。

林公公強調呢啲事件同五區辭職嘅議員轉過頭又落場參選好唔同，民意亦唔支持五區補選，仲強調政府認為修改補選例只係點樣做嘅問題，即係一定會做。

不過，特區政府做嘢出名議而不決，甚至會拖拖吓胎死腹中，補選例唔早啲補漏，再有議員玩辭職，容乜易搞到香港人又被玩多鑊o架！