小白觀點：南京咪一樣咁多人住

樓價貴到嘔，搞到好多小市民上唔到車，為咗有個蝸居，只好「慌不擇宅」，本來冇乜人吼嘅凶宅，依家都打崩頭爭住要，真係世界變。

其實凶宅有乜問題啫，古希臘哲學家講過，你唔可能伸隻腳落同一條河，小白老弟就認為，凶宅好少凶完再凶。唔係咩，你有冇聽過有人喺凶宅大吉利是兩次吖？冇吖嘛！咪就係囉。

話時話，凶宅呢家嘢都唔知點嚟，中華五千年，邊個地方冇死過人吖，正如南京曾經畀日本仔屠城，死人死得多喇啩，唔通又叫做凶城，唔再住得人咩？以前啲凶宅畀都唔要，淨係得喬寶寶啲Friend至識寶，百無禁忌搬入去住。唔係講笑，我見過有一家人住得風生水起，大富大貴，生埋個小寶寶，仲不知幾咁肥肥白白，所以千金難買凶宅呀！今時今日，想做宅男易，之但係要做「凶宅男」咩，難呀！

Email：sunsiupak@gmail.com

Blog：http://sunsiupak.blogspot.com

阿豪觀點：免租夠沖喜大吉利是

房屋署最近推出近二千個「唔受歡迎」嘅公屋單位，包括曾經發生過自殺或者兇殺案件嘅單位，勢估唔到呢啲凶宅都好搶手，唔係你話想住就即刻畀你住。

歸根究柢，咪就係因為生活逼人囉！家陣樓價仲咁貴，買就當然唔使諗啦，如果諗住租呢？業主又隨時話加租甚至收番嚟自用，一樣係冇乜保障。入住呢啲凶宅公屋單位就唔同嘞，肯定唔會被迫遷，仲可以免租一段時間，淨係呢樣嘢都夠沖喜番啲大吉利是嘢啦！

講開又講，依家喺香港地想搵個安樂窩都咁難，有間公屋在手，地位簡直可以媲美手執鐵飯碗咬皇糧嘅公務員！好似大家都係做清潔咁吖，豪伯打死都唔信有人真係好享受呢份工作，但係政府工同普通公司員工嘅待遇又真係差天共地喎，所以又點怪得凶宅公屋都爭崩頭呢？

Email：lukchiho75@hotmail.com

Blog：http://lukchiho.blogspot.com

網友觀點……

小新：住凶宅好似喺戲院睇鬼片咁啫，夠晒娛樂又平，梗係搶手啦。

老趙：收入微薄，連凶宅都買唔起呀！

喃嘸佬：睇個勢遲早實搶貴晒，到時真係搵鬼要至得喇！

陳居士：只要心中冇鬼，凶宅都可以變成安樂窩。