都咪話唔驚，日前有個十歲女童感染咗EV71型腸病毒，頭痛發熱、出斑疹不特止，仲出現腦膜炎症狀，要入深切治療部觀察。同校仲有另外七個學生中招，全校停課兩個禮拜。

講開又講，每逢學校爆發傳染病疫情，當局最叻嗰招就係停課，將學生趕出學校，就關人個關。學生返咗屋企之後會唔會發病，如果發病又會唔會傳染其他人，當局都闊佬懶理。講得白啲，就係將傳染病疫情由學校趕入社區，直情係靠害。

嗱，學生唔使返學，一定四圍去玩，去得比較多嘅係康文署轄下嘅兒童遊戲室。照理疫情殺到，康文署應該未雨綢繆，制訂新衞生防禦措施啦。但係本報記者巡視多個兒童遊戲室，發現署方懶懶閒，莫講話加強防疫，連原來嘅衞生措施都冇執行。

例如，按規定遊戲室開放一段時間就要清場消毒，然後再畀另一批人入場，但有啲遊戲室每節結束後淨係熄燈清場，過一兩分鐘就再開放，根本冇時間將啲遊樂設施消毒。

仲有噃，細路入場前本來要用消毒劑洗手，可惜有啲遊戲室嘅消毒潔手器掛喺成米高嘅地方，三、四歲細路點用噃。更得人驚嘅係，好多家長同細路都打赤腳出出入入，將啲細菌帶入遊戲室。有啲仲帶食物入去，一邊玩一邊食。

正如有傳染病專科醫生話齋，細路玩時流口水鼻涕，會沾污遊樂設施，波波池最高危。一句講到尾，全港嘅兒童遊戲室都變咗腸病毒傳播室，細路一唔覺意就會賴嘢。

問題被踢爆後，相關部門各有各講，康文署話已經提醒員工加強場地清潔同消毒，又話會同衞生署保持聯繫喎。衞生署就話，衞生防護中心有指引，規定學校如有EV71傳染病個案要呈報。真係九唔搭八。

之不過，都唔使大驚小怪嘅，事關班庸官不嬲都係少件事好過多件事，成碌四方木咁，唔踢都唔郁。其實呢種事都唔係第一次發生嘞，舊年流感社區爆發期間，本報記者就踢爆，康文署轄下兒童圖書室冇做足防疫措施，室內電腦冇及時消毒，又冇要求玩電腦遊戲嘅細路洗手，隨時會爆發疫情。康文署後來急急腳補鑊，但係事隔一年又舊病復發。

叮佢個鎯鎯，仲係嗰句，政府靠得住，豬乸會上樹。太一叮奉勸各位家長，如果唔想自己嘅細路有乜嘢冬瓜豆腐，就叫佢哋乖乖地留喺屋企啦，千祈唔好去康文署轄下嘅公共場所玩，否則，中咗招都唔知係乜事。