近年急速擴充嘅稻香集團雖然分店數目急增，但係管理一啲都冇鬆懈。早前撞到稻香嘅第二大股東兼執行董事Steve黃家榮，原來微服出巡係佢分內事，佢仲會趁巡舖時去醫肚，至愛係厚德商場稻香超級漁港嘅肥牛火鍋，美國肥牛係必食之選。
平時好少曝光嘅Steve，佢家族三代都從事飲食業，曾經同父親一齊打理北角嘅稻香飯店。十九年前佢同拍檔兼集團主席鍾偉平合資開辦稻香火鍋海鮮酒家，鍾負責經營策略同埋開店，佢就負責管理同監察，包括巡舖。
佢笑謂近年新入職員工愈嚟愈多，巡舖時未必識佢，試過有次佢直行直入，門口嘅知客姐姐叫停佢嚟問：「有乜幫到你？」佢笑謂：「你幫我搵多啲錢啦！」
