一向都以女強人嘅姿態示人嘅富貴黨主席Miriam劉健儀，其實都係一級慈母，為咗囝囝，暫緩離婚，政途、休息時間乜都願意犧牲。Miriam話當年為咗囝囝，雖然婚姻失敗，都一直忍耐，到囝囝十三、四歲有足夠理解能力先正式離婚，既係為咗囝囝太細個就要變單親家庭對佢唔公平，亦擔心佢會誤解父母離婚係自己嘅錯，有精神困擾甚至影響成長。
Miriam話早年冇全身投入地區工作同黨務，都係為咗囝囝，等到○三年囝囝出國讀書先全情投入，皆因囝囝有學習障礙，佢要諗方法幫囝囝讀書同應付公開試，有時出一斤力隨時一両嘅回報都攞唔到，好彩囝囝都生性冇放棄自己，前幾年囝囝大學畢業，佢先至如釋重負。
佢又話囝囝嘅教育問題由頭到尾都係佢獨力面對，最初都覺得好辛苦，但同自己講唔可以認命，就好似佢阿媽生五個都係女，身為台山人慘被白眼淨係識生蝕本貨，佢於是自細就立志要扭轉蝕本貨嘅標籤，努力讀書考入大學，畢業後仲半工讀自修考埋律師牌，為阿媽亦都為自己爭番一口氣！