近排城市論壇畀社民連支持者「紅衫軍」攻陷，變咗「城市亂壇」，唔肯蹚五區「公投」渾水嘅白鴿黨主席「鐵頭仁」何俊仁尋日上論壇，旋即變困獸鬥，可能鐵頭仁算到必遭圍攻，白鴿黨第二梯隊馮煒光、吳永輝同柴文瀚在場「護駕」。
鐵頭仁和一向強調同政府「又傾又砌」嘅民協前主席KK馮檢基尋日上「城市論壇」，全場被紅衫軍圍攻，「維園阿哥」任亮憲舉牌揶揄「民協又Eat又Take」，又批評白鴿黨放棄爭取二○一二年雙普選，唔屬於真正民主派，搞到鐵頭仁面燶燶。
不過，吹雞紮馬唔係「紅衫軍」專利，白鴿黨尋日亦埋下伏兵，身兼南區區議員嘅柴文瀚起身發言之餘，亦負起救「仁」職責，喺台下不停同任亮憲鬥嘴，分散任嘅戰鬥力，而當其他紅衫軍柴鐵頭仁台時，另一隻白鴿馮煒光亦加入一齊斥罵維園阿哥，嚟一招「圍憲救仁」。
馮、柴二人年紀唔細，唔係「老鴿」都係「中鴿」，兼且人丁單薄，同班後生鬥大聲梗輸蝕，鐵頭仁同KK始終難逃被圍攻嘅命運。泛民學者黃碧雲見咁嘅場面，都不禁勸雙方團結。