31/05/2010

播放本新聞相關短片

政情:食力簡世盃捧英格蘭

尋日喺沙田馬場遇到冠軍練馬師「食力簡」簡炳墀,佢打咗條金光閃閃嘅領呔非常搶眼,睇真啲原來上面印咗八年前日韓世界盃嘅字樣,食正即將開鑼嘅南非世界盃熱潮。原來食力簡唔止係馬迷,仲係球迷,八年前亞洲首次舉辦世界盃,佢就特登飛去睇現場,順便買咗呢條呔留為紀念。

咁今屆世界盃食力簡睇好邊隊呢?佢話早於一九六二年喺英國受訓時,已經係英格蘭足球勁旅阿仙奴嘅擁躉,經常揸車撲飛睇波,感受現場熱鬧氣氛,賭波都係賭英超,所以對陣中有好幾名阿仙奴星級球員嘅英格蘭情有獨鍾,今屆英格蘭人強馬壯,被各界捧為大熱之一,佢仲考慮緊飛唔飛去南非捧場添!

不過睇番英格蘭往績,自一九六六年嗰屆捧盃後一直都未試過攞冠軍,一向牙擦嘅食力簡冇得威威咪好失望?佢話踢波呢家嘢有時真係好難講,始終波係圓嘅,希望英格蘭今屆會有好表現啦!