高官讀錨字有懶音

尋日睇過政府網「一站通」連結上嘅「起錨」YouTube片段，發現留言欄上嘅五十幾個網民留訊，清一色都係鬧爆，想搵個人讚吓都冇，連搵人上網造勢都唔識，煲呔曾嘅心戰室唔通被人鬧到士氣消沉，已經死火拋錨？有人留言揶揄煲呔曾管治團隊已係爛船一隻：「起錨讓爛船沉沒，坐佢隻船肯定沉船，坐足全程下落不明。」

另外一名網民仲非常心水清，話煲呔曾、唐唐同鬍鬚曾都讀錯過「錨」字，話應讀naau4，即發鼻音，而唔係laau4，證明懶音唔係青少年嘅專利。

唔單止咁，煲呔曾仲扮潮，將「起錨」爛騷搬上網絡，開咗個facebook群組，諗住吸引青少年，係就係激起網上熱潮，但唔係支持政改，而係惡搞「起錨」風潮，繼有人創作咗「政改超錯」海報後，尋日喺網絡湧現嘅惡搞作品更加有如雨後春筍，好似將政府宣傳單張嘅「起錨」字樣，改成「起義」同「拋錨」，其中嘅「收皮」群組，仲大受網民歡迎，同「起錨」群組相映成趣。

「收皮」群組成立一日，已經徵集到超過四千個粉絲，網民反應熱烈；反觀政府嘅「起錨」群組只有一千二百人表示鍾意。「收皮」群組人數差唔多係「起錨」群組嘅四倍，呢個民情巨浪，可以話對煲呔曾嘅「起錨」騷一盆冷水兜頭淋，睇嚟煲呔曾呢檔「起錨」騷真係可以收得皮！