小白觀點：同小市民定義唔同

煲呔曾同班高官出嚟嗌「起錨」，即刻畀網民惡搞變「起義」，Poster改做青天白日旗，呢啲咪叫「起錨」囉！

事實上，煲呔曾所講嘅「起錨」，個意思好明顯同香港小市民一般用嚟表示「走人」、「散水」唔同，不過，曾爵士近排心繫散水，佢老哥忽然拋書包話「一簑煙雨任平生」，好明顯已經等唔切貶官收工啦。

咁啱內地徵集緊推廣中華文化嘅詞彙，官方推薦「烤鴨」、「吃醋」，網民則另有心水，認為「腐敗」同「跳樓」最能反映中國嘅現狀。所以呢，我建議為咗避免七百萬市民谷爆，情緒激昂咁唱住「起錨！起錨！起錨！不願做奴隸的港人」上街，煲呔曾大可以改用「肴底」、「收皮」。除此之外，亦為咗呢班黃皮白心嘅假洋鬼子唔使嗌得咁尷尬，不如簡單啲叫「Hong Kong Up」，中譯「雄起」又得，「勃起」亦得。

e-mail：sunsiupak@gmail.com

Blog：http://sunsiupak.blogspot.com

阿豪觀點：自己友都反得啖笑

煲呔曾同成班高官出街宣傳政改，仲高叫「起錨」口號，寓意政制向前走喎！嘩，佢唔係咁高估自己受歡迎程度呀？小心一陣「起錨」變「拋錨」呀！

事實證明真係冇話錯佢㗎！嗱，先唔好論佢推銷嘅產品吸唔吸引，淨係計佢今次作為Sales嘅表現，已經唔合格啦。可能佢已經幾十年冇做推銷員，竟然夠膽喺三個鐘頭派得嗰五張傳單咁大把，如果換轉係普通派傳單嘅，一早已經畀人炒咗啦！

呢場騷，表面上話要同市民交流，但係就搞到好似古時候皇帝出巡咁。睇番啲相，只見有大批警員手拉手築起人牆，班高官喺後面細粒到幾乎唔見影。

最好笑係，連建制派都批評今次係做騷。情況就好似有人打電話宣傳叫你借錢或者話你聽中咗獎，後面竟然傳嚟雜音，話「邊有咁大隻蛤乸隨街跳」，真係得啖笑呀！

e-mail：lukchiho75@hotmail.com

Blog：http://lukchiho.blogspot.com

網友觀點……

懶　人：希望大家唔好發茅，要理性咁討價還價，先可以達成「向前行」目標。

賓　仔：幾驚佢哋噏咗起義，咁就大件事！

上水人：巴士上點起錨？赤膊企喺船上大叫起錨至係good騷！

雪糕仔：泛民嗰班議員都唔合作，叫乜嘢口號都冇用。

有料爆：

個營養學家度咗條免戒口減肥菜單，肥人佳音呀！

SMS傾埋一份：6016 2496