講開又講，校方點解唔先起清求職者底細呢？其實，校方亦有難言之隱，事關當局以保護私隱為名，唔肯將教師干犯性罪行資料交畀校方，校方又有乜法子呢。當局咁搞法，簡直係靠害。

教育局日前出招補鑊，提醒學校要求新聘外籍英語教師提交所屬國家發出嘅「良民證」。咁做本來冇錯，問題係，當局只要求外籍教師提供良民證，但本地教師只需自行申報有冇犯罪紀錄就得，咁即係掛一漏萬啫，唔怪得有校長批評當局做嘢半桶水。

講真，當局嘅諗法確係太傻太天真，唔通淨係外國人先至會有刑事紀錄咩？呢幾年涉及風化案嘅淫師，絕大多數都係香港人，當局對本地教師網開一面，唔止自欺欺人，甚至可能涉及種族歧視添。

港府做嘢九唔搭八，既然要求外籍教師提交良民證，點解唔一視同仁？正如有教師團體話齋，無論係本港或外籍教師，都應該要求佢哋提交良民證，應該好似公務員入職咁，查清楚底細，令學童獲得保障。

話時話，因乜事當局唔要求本地教師交良民證呢？原來當局對本地教師另有政策。早前教育局提出四招：一，建議學校喺聘用合約列明，有刑事紀錄嘅教師一定要申報；二，建議學校透過教師電子資料庫查核新聘教師資料；三，校方可以喺教師離職信上注明係被「解僱」或「即時解僱」；四，校方有權向申請人嘅前僱主查詢其表現。

聽起嚟係威係勢，好似萬無一失，其實係有姿勢冇實際。試問，有邊個新教師會喺入職表上注明「曾胸襲女生」或者「曾偷拍裙底照」呀？另外，教師如果干犯咗刑事罪行，走都走唔切喇，點會慢慢等校方炒魷，仲要喺離職信標明「解僱」字眼呀。

既然係廢招，點解當局仲要煞有介事咁提出呢？無他嘅，呢四招唔係用嚟防狼，而係用嚟卸膊，有咗呢四招，當局就可以將查核教師表現嘅責任卸晒畀校方，以後就算出事，都與當局無關。對佢哋嚟講，最緊要唔使孭鑊，話之你學童安全有冇保障啦。

可憐天下父母心，邊個唔想自己嘅細路喺平安環境中讀書呀，請問教育局各位高官，你哋會放心畀淫師教你哋嘅仔女咩？叮！