深圳巿政協今年踏入第五屆，亦係換屆之年，第一次會議尋日揭幕。今年名單中加入咗唔少大家熟悉嘅名人二代，好似即將接任做百仁基金主席嘅菁英會創會主席施榮忻（Jaime）、觀瀾湖老闆朱樹豪二仔朱鼎耀、玩具大王蔡志明囝囝蔡加讚、福建幫頭領盧文端囡囡盧金治，仲有去年至加入香港青聯同菁英會、今年二十四歲嘅楊受成細仔楊政龍（Alex），Alex仲成為最年輕嘅深圳市政協委員。
至於本來同老公馬鴻銘一齊喺香港特邀人士界別嘅蔡志明大女蔡加敏就冇再做，馬鴻銘亦轉咗去歸國華僑聯合會界別。
Alex話以前冇深圳手機，做咗委員後特別出咗部。至於較其他名人二代少參加社會組識嘅蔡加讚，尋日都有去開會，話感受到政協對深圳嘅貢獻好大，表示今次係難得機會，定會畀心機學嘢，加上姐夫馬鴻銘都係委員，佢會向各位前輩學習。