潮州菜喺香港大行其道，更係潮州人嘅首選。立法會「五散人」之一嘅保險界代表陳健波係「潮人」，平時好鍾意去灣仔佳寧娜食潮州菜，貴價可揀鮑參翅肚、燕窩或響螺片，廉宜又可以食啲菜甫煎蛋、涼瓜鹹菜黃豆排骨等，潮州甜品更係佢回憶童年艱苦歲月必不可少嘅食品添。
陳健波早兩日請客，菜單係傳統嘅潮州菜，包括滷水鵝片豆腐、蝦丸拼蟹棗、水瓜煮魚蛋魚鰾、菜甫煎蛋、涼瓜鹹菜黃豆排骨煲同沙爹牛肉蠔仔炒河。佢特別激讚「水瓜煮魚蛋魚鰾」啲魚鰾好入味，炆到夠晒腍，例牌只不過係八十蚊。
陳健波至愛嘅甜品，分別係反沙香芋條、羔燒五仁甜四寶同潮州油粿。佢話，食食吓呢啲甜品，就不時會諗番童年由潮州坐船偷渡來港嘅艱苦歲月，所以潮州食品對佢嚟講，更係心靈雞湯。