唔想爬定爬唔上？

事關尋日立法會政改小組開會時，林公公畀白鴿黨嘅劉慧卿點名，要求政府唔好喺二○一七年普選特首嘅安排上加篩選機制，跟住數咗五個包括葉劉淑儀、林瑞麟嘅人名出嚟，話「淨係得呢啲人畀我哋揀！」輪到林公公回應時，佢好淡定咁話：「劉議員提到小弟個名，我哋服務政府嘅人要知所進退，將來普選特首時，如果喺紅館開個櫃位畀人遞提名表，我諗條隊由紅磡排到中環都未輪到小弟。」

林公公仲話，自己會專心做好政制嘅工作。佢嘅答覆同城中幾個熱門人物嘅官腔好類似，只係，呢番表白心迹亦難免引嚟一啲猜測，譬如林公公係唔想爬上去吖，定係爬唔到上去呢？佢美其名話自己「知所進退」，只想做好政制嘅工作，但二○一七年佢有冇得做政制工作都係問題啦！