政府問責高官尋日總動員落區派傳單，撞啱立法會議員隊尋日同高官隊對賽，結果爆出單疑似打假波事件，因為高官隊連擺烏龍，兩次射波入自己龍門送分畀人，有實力卻輸波。議員隊嘅領隊「IT豪」譚偉豪賽後都忍唔住話：「政府派傳單想向我哋拉票，依家又醒兩球畀我哋，可能遲啲國際足協都要跟進吓，哈哈！」
乜嘢意思？咪係質疑高官隊點解咁烏龍囉，唔通以為喺球場輸兩球，可以換嚟立法會四十票支持政改方案？因為嫌疑人之一、政制及內地事務局局長林公公尋日先喺立法會講過，踢波最緊要唔好企喺度，要落場踢先有波入，如果大家跟住規則做，七年十年後就可以入到兩球。轉過頭，高官隊確係入兩球，邊有咁啱㗎？
講番尋日嘅陣容，高官隊有新任運輸及房屋局常秘（房屋）栢志高，同埋做咗北區民政專員嘅「小Donald」陳羿。議員隊方面就有領隊IT豪，隊員「高達」李永達、陳克勤、梁家騮、「長毛」梁國雄同「大舊」陳偉業。啱啱畀中聯辦副主任李剛寸完唔知係幾品嘅長毛棄用頭巾，改用紗布包頭，仲大大聲話自己不嬲都冇品，咁講係還拖定認衰呢？