霍家長孫霍啟剛係廣州亞運會義工團團長，尋日香港志願者協會招募亞運會義工，佢親身進行面試。佢透露，未來一段時間好忙，六月中要帶青年團去天津，八月又要做團長，帶團去新加坡出席青少年世運會，所以世界盃六月十一日開幕，佢都未必有時間捧場。
霍家成員大部分都有體育狂熱細胞，啟剛爸爸霍公子一早講咗到時會飛過去出席世界盃開幕禮，二佬啟山亦會飛過去睇決賽同閉幕禮，霍公子仲話希望到時可以撲到飛陪啟山一齊睇閉幕。啟剛無緣親身過去感受氣氛，只可以留喺屋企睇電視轉播。
講番廣州亞運義工團，有成五百幾人報名，人人都要自費畀住宿同交通費用，義工團努力傾緊大學住宿嘅價錢，如果搵到贊助就更好嘞！
