「蔡母遇險」籤文係：「狂風驟雨打船篷，溪畔桃花盡落紅，驚醒漁翁春夢熟，持篙撐去失西東。」意謂漁翁險象環生，撐船失晒方向，暗示本港政治環境凶多吉少。煲呔曾尋日率領問責官員鬼祟落區做騷推銷政改方案，口號咁啱係「起錨」，即係將船錨收起等艘船開動前進，寓意要通過政改方案等政制發展前進，完全係順應籤文啟示繼續發展。

不過，煲呔曾由遲遲未能表態會唔會喺立法會補選中投票，到補選後邀請「五區公投」總發言人余若薇進行電視直播辯論，搞到泛民不滿，建制派群起攻之，真係應晒撐船失晒方向嘅講法，結果最新民意調查顯示反對佢嘅人數創新高，仲拖累政府民望急跌破底，政改方案如果衰咗，煲呔曾分分鐘玩完，最弊係佢搞到七百幾萬人搭嘅船沉埋啫。