林鄭尋日喺電台上講到官員走入群眾，並以自己○七年七月落天星碼頭同年輕人對話為例，話自己曾經做過年輕人，又係兩個青年人嘅媽媽，好了解年輕人嘅思想，藉此拉近同現場青年人嘅距離。不過，佢之後詞鋒一轉，話發現近排官員走入群眾時遇到啲唔好嘅現象。

佢帶啲委屈咁話：「不時聽到有人話『可恥』，我好唔受得呢兩個字，可能呢句說話嚟自英文『shame』，英文冇咁難聽……但中文……唔知點解我們女士們對個恥字真係好有意見！」佢坦言自己好唔想聽到，但好多時一落到現場已經聽到「一大撮」呢啲聲音。林鄭歸咎社會出現謾罵之風，似乎佢認為係社會同市民嘅錯，官員成為無辜捱鬧嘅犧牲品！

老早開始國情交流

林鄭大吐苦水之時，似乎更應該反省點解香港人愈嚟愈激進，愈嚟愈多人指摘政府同官員「可恥」呢？如果政府同官員真係做得好嘅，民間點會有「一大撮」無恥嘅斥責聲呢？所謂「吾日三省吾身」，但政府中最打得嘅官似乎只識唱「都是你的錯」。

責難外界之餘，林鄭尋日都趁機大講往績，佢話自己讀大學嘅三年，大部分時間都唔係讀書，而係參與社會時事，仲喺國家未改革開放時，已經到清華大學交流，認識國家同認識周邊事物。佢解釋咁早參與國情交流活動係因為「自己老」，不過，心水清嘅人可能覺得佢向內地交心就真。