小白觀點：「更正與澄清」應放面版
豪伯自爆追開《明報》「更正與澄清」欄目，真係估唔到佢咁有品味。你知啦，呢份報紙錯漏百出，仲夠膽自己讚自己「公信第一」，肉麻到痹，基本上唔係好多人識得欣賞。
之不過你咪理，日月報出奇地好受學校歡迎，因為以前仲有查大俠喺度頂住，好學生可以攞份報紙包住蛇貓狗拎返屋企睇，道貌岸然嘅老師則可以用嚟掩飾另一份乜乜領先，唔理新聞好醜，尚算有掩護作用。
時勢唔同囉，依家呢份報紙江河日下，要讀者真金白銀畀錢買更加唔易，係時候要搞吓改革喇，既然「更正與澄清」咁受歡迎，比佢哋嘅新聞更權威，一於日日放喺面版！仲有喎，由於編採求其，樣樣得過且過，難保連「更正與澄清」都有出錯，到時版版只要刊登「更正與澄清」就夠晒數，新聞都唔使做，慳番嘅錢可以吊耐啲命。
e-mail：sunsiupak@gmail.com
Blog：http://sunsiupak.blogspot.com
阿豪觀點：亂點學生累通識捧蛋
《明報》真係「好睇」，喺度講個秘密畀大家聽，豪伯平時得閒都會揭吓呢份嘢，唔係因為佢係咩「公信第一」，而係追開佢「更正與澄清」欄目，就好似玩Photo Hunt咁搵錯處，然後喺第二日見報份報紙搵答案，都幾過癮o架。
而且，佢哋唔會安於就咁出錯，有時錯得嚟仲會相當應節，嗱，好似世界盃就快殺到，佢哋就將「雷米金盃」同「大力神盃」撈亂，認真「好波」。
最近一次仲離譜，佢哋竟然將「廣西壯族自治區」寫錯為「廣西藏族自治區」。嘩，呢份報紙入晒學校，容乜易有學生跟住嚟答通識題o架，咁實行捧蛋都得嘞！
《明報》最近因為重複散播誹謗言論，要向《東方》同其管理層賠償一百八十萬。計我話，佢哋成日散布錯誤資訊，都應該賠償番畀讀者！
e-mail：lukchiho75@hotmail.com
Blog：http://lukchiho.blogspot.com
網友觀點……
戇 豆：點解明報會請埋咁多差不多先生o架？
安察駱駝：獎盃都未識分，點樣去迎接世界盃？
老 趙：好彩唔係醫療機構咋，成日咁搞錯真係死得人多！
胖 虎：會唔會連自己《明報》個名都會搞錯o架？
有料爆：
一時「一簑煙雨任平生」，一時「起錨」，勁難頂！
SMS傾埋一份：6016 2496