因超市落毒案以及抹黑東方報業集團而幾度被判監嘅「香港拉登」馬照聲，曾多次喺高等法院門外擺放載有誹謗《東方日報》及其管理層內容嘅易拉架，而自詡「公信第一」嘅《明報》居然為虎作倀，圖文並茂刊登有關內容，重複散播誹謗言論，東方因此入稟高院民事控告《明報》。高院原訟庭尋日頒發判決書，裁定東方勝訴，《明報》誹謗罪成，需向東方及其管理層賠償合共一百八十萬元，當中包括加重性額外賠償。如果計埋雙方律師費，《明報》今次唔攞幾百萬出嚟都幾難走得甩。哈，咁咪叫做自作孽，不可活咯！

整件事嘅來龍去脈係咁嘅。自稱香港拉登嘅馬照聲，○一年九月致函《東方日報》，聲稱喺超市食品內落毒，要求「千古罪人」董建華下台，否則策動「港版九一一」。東方報業集團恐禍及無辜，即時報警，並協助警方喺最短時間內拘捕馬照聲，及時阻止被落毒嘅食品流出市面。由於證據確鑿，馬照聲被判入獄六年八個月。點知呢個冒牌拉登懷恨在心，出獄後為求報復，百般滋擾及抹黑東方報業集團，結果再被裁定兩項刑事恐嚇罪成，判監九個月。

馬照聲先後多次入獄，好明顯係罪有應得，但佢居然口口聲聲話係冤獄，甚至指調查此案嘅警員受賄屈佢。咁就好笑喇，落毒案人證物證俱在，如果咁都係冤獄，豈不是話香港冇晒法治？而講到警員受賄屈佢喎，更加係無厘頭，如果真係有人受賄，廉署及警方都唔會放過喇。

查實，正牌拉登也好，香港拉登也好，都係過街老鼠，臭名昭著，無論馬照聲點樣做騷，市民都當佢係小丑，毫無新聞價值可言。惟獨《明報》好似執到寶咁大肆報道，擺明同香港拉登着埋一條褲，蛇鼠一窩。《明報》以為鬼鬼祟祟、閃閃縮縮就可以過到骨，殊不知天網恢恢，疏而不漏，卒之都逃唔過正義嘅懲罰，簡直係大快人心，人心大快！

叮，一份自詡「公信第一」嘅報紙淪落到如此地步，講起真係眼冤。想當年，查良鏞查大俠幾經辛苦創立《明報》，鐵筆直書，弘揚正義，針砭時弊，黑白分明，先至奠定咗江湖地位。點知將軍一去，大樹飄零，查大俠急流勇退之後，《明報》就好似正氣凜然嘅華山派傳到偽君子岳不群手中，從此不斷墮落，一日不如一日。大家可以睇到，《明報》唔單止同香港拉登着埋一條褲，更加與反中亂港傳媒狼狽為奸，搞風搞雨，惟恐天下不亂。但最好笑嘅係，呢張陰陽怪氣嘅報紙，仲夠膽以知識分子報自居，將自己打扮成道貌岸然，唔知嘅畀佢嚇死，知嘅就畀佢笑死。呢，世界上有種人既要做婊子，又要立貞節牌坊，《明報》咪就係當中嘅人辦咯。

不過咁，公道自在人心，今次法庭嘅裁決，總算伸張咗正義，令《明報》呢種偽君子得到報應。「小小寰球，有幾個蒼蠅碰壁，嗡嗡叫，幾聲淒厲，幾聲抽泣。」太一叮想講嘅係，邪不能勝正，如果《明報》唔吸取教訓，死性不改，好似蒼蠅咁不斷滋擾，等待佢嘅必定係更悲慘嘅下場。毛主席話齋：搗亂，失敗，再搗亂，再失敗，直至滅亡！叮你個鎯鎯！