自從煲呔曾公開單挑公文袋黨魁余若薇喺電視辯論政改後，同中央溝通緊嘅白鴿黨即刻打爛醋埕，覺得煲呔曾太抬舉公文袋。雖然之後白鴿黨話唔會阻撓呢場電視辯論，但酸溜溜嘅態度就改唔到。泛民主派尋日開飯盒會傾辯論細節，白鴿黨主席「鐵頭仁」何俊仁寧願出席同一時間嘅立法會同高官嘅午宴，都唔肯去幫余若薇度橋，擺明係唔騷佢，請佢食檸檬。
其實余若薇之前已多次想開飯盒會同其他泛民商量吓辯論對策，第一次喺上禮拜五，但適逢係假期，白鴿黨話冇人得閒去，結果開唔成。之後佢諗住上禮拜六搞政改公聽會實齊人，打算抽時間出嚟傾一傾，點知白鴿黨又話冇人去，飯盒會再次胎死腹中。
雖然尋日成功搞得成飯盒會，但白鴿黨九個議員只得黃成智出席，其他人除咗卿姐，都去晒同煲呔曾食飯，擺明要冷待公文袋。其中鐵頭仁做得最明顯，佢本身並冇答應出席午宴，點知尋日朝秘書處收到佢電話要加多個位。暗示啲乜嘢？明眼人一睇就知啦！
鐵頭仁解釋話佢嗰段時間本身約咗人，所以唔打算參加飯盒會同午宴，但臨時朋友唔得閒，又覺得好耐冇同高官食飯，所以先改去午宴喎！各位覺得合唔合理呢？