對粵劇有讚冇彈

問起覺唔覺得香港樓價過高，佢話以前住開嘅倫敦都出名樓價貴，而佢只打算喺香港租樓住，唔使擔心樓市起跌。佢又話今次只會一支公搬嚟香港，太太同兩個仔都會留喺英國，唔需要租太大地方，唯一要求係放得落個鋼琴，等佢可以得閒彈琴減壓。

佢早前講過對粵劇戲曲全無認識，管理局就喺佢日前探訪演藝學院時，安排咗批學生表演粵劇，佢睇完之後當然有讚冇彈，仲話粵劇同十八世紀嘅歐洲歌劇有幾分相似。佢又喺百忙之中抽空同八和會館代表飲茶傾偈，之前亦特別同八和主席汪阿姐見過面，做足工夫補習兼補鑊。