本文重點
政界人物針鋒相對司空見慣，但中聯辦官員向民主派反唇相譏，回歸後唔多見，而今次點火頭嘅係社民連嘅立法會議員「長毛」梁國雄，佢日前話如果獲中聯辦副主任李剛邀請見面，佢樂意出席，但形容對方只係九品芝麻官。李剛尋日見完民協，當記者一提到「梁國雄」三個字，佢即刻入晒自動波，主動反擊長毛。
李剛首先一派正經咁話好感謝長毛抬舉，仲當佢係一名官員，但係喺佢心裏面，自己只係一名普通嘅社會公僕，佢同其他同事一樣都係按照中央政府賦予嘅職責，忠誠履行義務。然後，佢話鋒一轉，寸爆長毛：「而當然我不知道梁國雄先生在立法會裏屬於幾品議員，但是，我相信一定高於九品，也相信他有機會見到和他同品級的官員。」
風趣生鬼令人印象深刻
呢句相信長毛高過九品可謂語帶相關，即係十品或以上，都係低班次。李剛話相信長毛有機會見到同自己同品級的官員，言下之意，即係佢唔會邀約長毛見面。
有建制派議員表示，經過呢幾日，先知道李剛咁風趣生鬼，好似第一日見完白鴿黨，喺記者會話未收到全國人大常委會副秘書長喬曉陽嚟香港嘅消息，收到就第一時間通知記者；其後見普選聯，喺裕華國貨向記者匯報會面情況，被問起係咪「降格」，佢反叫記者「唔好自貶身份」，都令人留下深刻印象。