小白觀點:原來手(月爭)比手掌敏感

唔係講笑，依家批(月爭)好似病毒咁傳播開去，周街都係撞胸阿叔，女士出街都唔好話唔驚呀，話唔埋搞到「十一連批」，咁就大劑喇。為咗呢一連串嘅非禮事件，我去公立圖書館借咗本《十萬個為甚麼》返屋企，花咗兩晚時間睇晒佢，知識當堂大增，如果你問「動物為甚麼不會迷失方向？」「為甚麼地球及其他行星也是圓的？」甚至「長頸鹿的脖子為甚麼那麼長？」我統統都識答，之但係「撞胸阿叔為乜一定要批(月爭)？」哦，恕我啞口無言嘞。

好彩，多得公立醫院嘅護士為大家解答咗呢個問題，唔係有個護士整咗單淥傷B事件，我相信冇乜人知，原來試水溫唔可以單單伸隻手落去o架，點解？原來手(月爭)比起手掌更敏感，所以呢，所謂「祿山之爪」，原來係以訛傳訛嘅流言，冇乜科學根據！

Blog:http://sunsiupak.blogspot.com

阿豪觀點:女士們不妨學麥當娜

本報智破觀塘「撞胸阿叔」，協助警方拉人，可以話係為社區除一害，大快人心。原本以為觀塘區婦女可以鬆一口氣啦，點知懷疑有人唔知衰，竟然跟住嚟做，結果被拉上差館添！

開講都有話，第一個用花比喻女人嘅係天才，第二個用花比喻女人嘅係庸才，第三個用花比喻女人嘅係蠢才。點講都好，模仿天才始終都唔難理解，之但係模仿一個蠢才嘅所作所為，就真係抓爆頭都諗唔明嘞。唔係咩？之前已經有個「撞胸阿叔」斷正o架啦，點解仲有人咁蠢要學佢呢？

啲撞胸色狼咁猖狂，女士們究竟有乜計防範呢？你知啦，畀啲衰佬博咗懵，就算報警拉人，始終都已經蝕底咗。豪伯喺度試吓拋磚引玉：各位姊妹不妨學吓麥當娜咁，着錐胸衫，一嚟夠晒型—依家Lady GaGa都復古着番啦—二嚟如果班死佬仲夠膽再撞，實行同佢個身開窿都得呀！

Blog:http://lukchiho.blogspot.com

網友觀點

B仔：女仔出街會唔會冇安全感？咁多撞胸阿叔、影裙底色狼……

秦先生：唔好撞得咁過癮，因住撞正個偽娘畀人打！

小新：係咪阻嚇力唔夠？觀塘阿叔踎完監半年咪一樣重施故技……

三叔：簡直係影衰晒全港嘅阿叔，搞到啲女人怕晒我哋！