呢位英國靚女前日喺中環畢打里無端端畀隻巨鼠噬咗一啖，皮破血流，睇人補鞋變咗畀人送去睇醫生，「旅遊天堂」原來係「老鼠樂園」。食環署滅鼠不力，呢鋪香港乜架都丟晒咯。

嗱，賊過興兵係政府部門獨門秘技，食環署尋日補鑊補得認真誇張，除咗派人去現場巡視，喺後巷同陰溝放鼠籠同藥餌呢啲例牌菜之外，仲話要加多一招「鼠過開槍」，出動高壓水槍「掃射」附近街道，窿窿罅罅都唔放過，要「徹底清潔」咁話。平時唔做嘢，鼠患失控爆大鑊，連遊客都咬埋，署方至大陣仗做場「滅鼠清潔騷」，遲唔遲啲呀？

最搞笑就係，嚇到女遊客花容失色嗰隻巨鼠有成十吋長，畀附近檔主打死嘅另一隻老鼠亦有六吋，有中西區區議員話，喺附近親眼見到老鼠橫行。但食環署居然堅持話，事發地點並唔係鼠患黑點，當局過去十個月未收過相關投訴，過往三年亦未試過有人畀老鼠咬喎。

叮！如果有人「遇襲」至算鼠患黑點，咁就大鑊嘞。即係話，就算老鼠通街走，甚至好似上次喺旺角咁，走到上迴轉壽司店做Live Show都唔叫鼠患。香港老鼠之所以咁惡、咁風流快活，原來有食環署「照」住，唔怪得驚都未驚過。

有冇鼠患，附近商舖最清楚。有檔主話，食環署喺每個檔舖放咗兩個鼠籠，近期的確多咗老鼠，佢嘅檔口呢個月已經捉咗六隻。明明鼠患愈嚟愈嚴重都當冇事，食環署係吞泡蛇王唔做嘢，定係根本唔識捉老鼠？

講開又講，查實食環署葵青區防治蟲鼠組前幾個月曾畀人踢爆幾乎「零工作」，每日十個鐘工作時間，唔係匿埋吹水、睇報紙等收工，就係喺「蛇竇」外曬菜乾，甚至開住公帑租嘅車返屋企辦私事，呢份工直頭「超筍」啦。

偷懶蛇王不在話下，做嘢一樣係求求其其，鼠餌係咁意放入坑渠就算，有啲甚至掛喺牆度，老鼠要「跳高」至食到，滅到鼠至奇。廣州鼠王前年獲邀來港獻技，喺旺角區一粒鐘就捉咗十七隻大老鼠，而食環署嘅油尖旺區「滅鼠大行動」，九日至捉到兩隻咁大把。

食環署愈來愈懶，老鼠愈來愈狼，正一係「蛇鼠一窩」。計太一叮話齋，食環署滅鼠，老鼠愈捉愈多，不如連防治蟲鼠組都摺埋，慳番啲公帑，請廣州鼠王再戰香江，一支公搞掂晒咪得囉？叮！