女星喺微博自爆：「我今天訂購了一隻盆景貓，明天便有貨，Yeah！」仲上載咗張圖，清楚見到有隻貓畀人質咗入奶樽，立即畀網友狂插。查實虐貓呢家嘢符合中國人嘅國情，有人用高踭鞋狂踩，有人斬手斬腳，有人喺貓頸綁緊橡筋，要幾殘忍有幾殘忍。

唔好話中國人對貓或者其他小動物無情吖，對人都唔好得幾多㗎咋，前排有個抱嬰黨女人偷手機斷正，唔知發乜神經，一二三將手上嗰件「生財工具B」掟落地，仲狂踢洩憤，將貓入樽又有乜值得大驚小怪？講到入樽，睇李翰祥嘅清裝電影就知，將人斬手斬腳放入個埕度都有啦，真係睇唔出，呢個妹妹原來對歷史幾有研究。

聽講佢阿媽愛女心切，死撐話張相係假，同大家開吓玩笑咁喎。口講無憑，不如搵港版老翻神探伽利略出嚟查個水落石出啦！

e-mail：sunsiupak@gmail.com

Blog：http://sunsiupak.blogspot.com

阿豪觀點：凸顯製作者懦弱心態

所謂「盆景貓」，即係將隻貓放入個樽度，齋聽已經覺得變態，點知原來真係有人buy。某名人喺外國留學嘅女，喺微博自爆訂購咗「盆景貓」，仲話第二日有貨添，件事傳咗出嚟即刻引發眾怒。

有人話「盆景貓」係美國大學生搞出嚟嘅惡作劇，亦有人話喺日本真有其事。係真又好係假又好，都唔可以一句話係講笑，就諗住封住大家把口，要知道，嘢可以亂食，說話唔可以亂講，好似話之前有個網友揚言要炸某主題公園，最近又有青年喺網上討論區揚言要炸禮賓府，都一樣判咗罪啦。

撇開殘忍唔講，「盆景貓」呢個概念足以凸顯啲人嘅懦弱心態，淨係識得恰啲冇反抗能力嘅小動物。咁勇猛，點解唔去製作「盆景豹」或者「盆景象」呢？你整得到，豪伯即刻寫個「服」字畀你，仲會買生果去監獄探你添！

e-mail：lukchiho75@hotmail.com

Blog：http://lukchiho.blogspot.com

網友觀點……

老花貓：呢位女星最啱做變態女殺手呢類嘅角色。

棠　棠：唐小姐受千夫所指，佢依家同隻「盆景貓」一樣都係咁慘！

周　仔：咁殘忍都有人買，唔怪得依家咁多虐貓狂徒！

阿　甘：普通人話買唔會有咁大反應，名人唔想衰最好咪亂咁噏。

有料爆：

鬧市驚現十吋巨鼠，係咪好應該申遺先？

SMS傾埋一份：6016 2496