近日中聯辦副主任李剛接連同泛民主派代表會面討論政改問題，每次示人均着住筆挺西裝，恤個蛋撻頭，雙目炯炯有神。李剛現年五十三歲，進入「知天命」之年，頭髮仍然保持天然濃密烏黑，究竟有乜養生秘訣呢？原來就係全憑長期服用幾萬蚊一斤嘅冬蟲夏草。
原來李剛每晚臨瞓前會喺暖瓶放兩條冬蟲夏草浸暖開水，浸到第二朝起身飲晒佢，連蟲草渣都食埋落肚，夠晒滋補，長年累月服用，自然固本培元。佢咁識得滋陰補腎，據聞皆因當年佢喺國務院新聞辦主管青藏地區工作，因緣際會下學識食冬蟲夏草，但近年冬蟲夏草貴到幾萬蚊一斤，佢由每日食兩條減到食一條，有時甚至少食，一於慳住荷包。
李剛頭髮濃密烏黑，令好多朋友嘖嘖稱奇，紛紛問佢有乜駐顏妙法。據講李剛自爆有少量白頭髮，但由於白頭髮髮質較軟，垂落嚟唔多覺眼，但近睇就會現形，幸好中聯辦有個嚟自釣魚台國賓館嘅理髮師傅幫佢恤好個蛋撻頭，大風都吹唔散。
其實，其擔任解放軍藝術學院舞蹈系主任嘅太太劉敏亦保養有法，現年五十二歲仍然美麗動人，曾被內地媒體稱為「最美麗的女將軍」。佢同李剛結婚後一直夫唱婦隨，陪伴在側，李剛調任到中聯辦後，兩夫婦分隔兩地，但劉敏不時會嚟探老公。