消息人士透露，喺中央眼中，經濟動力同富貴黨都係工商界黨，有助拉攏商界，中央希望兩黨平衡發展，唔會插手干預，更遑論會扶一邊、壓一邊，以免議會工商界力量又回復到富貴黨一枝獨大嘅年代，難以駕馭。

過去兩年中聯辦一直喺經濟動力同富貴黨之間玩平衡。舊年八月副主任黎桂康陪同富貴黨骨幹遊西藏，保持緊密聯繫；直到最近政改大戰，中聯辦副主任李剛召開商界「誓師大會」，富貴黨、經濟動力同列上賓，反映中聯辦呢套權力平衡政策喺未來一段日子都唔會改變。

建制派政黨嘅生命線，相當部分掌握喺中央手中，呢個係香港嘅政治現實，中央政策傾斜與否，直接影響經濟動力同富貴黨未來興衰，依家中央嘅天秤兩邊均等，係龍係蛇，就睇兩黨嘅修為同造化喇！