立法會審議停車熄匙草案委員會尋日開會，身兼富貴黨主席嘅立法會航運交通界議員劉健儀又再發炮，話新加坡同英國推行停車熄匙措施，任何車輛都冇豁免，但到今時今日未有被檢控嘅個案，只係事前警告了事，仲質問政府會唔會參考呢啲做法。

跟住工聯會嘅議員「阿王」王國興就有啲㷫咁話，喺酷熱嘅天氣下，的士停車熄匙等客，車廂氣溫比室外仲要高，會影響司機健康，仲要求環境局局長邱騰華喺酷熱天氣下，去的士車廂感受吓。

咁又係呀，政府講嘢不嬲淨係得把口，好似邱局長以前都做過騷，去完立法會行路返政府總部，但事後被踢爆佢座駕空車駛返去，咁咪一樣排廢氣。正如佢成日坐喺office歎冷氣，但就要班司機大佬喺三十幾度下焗桑拿，又點講得過去呀？

聽聞有的士團體邀請各黨派喺下月初去的士站頭視察，咁邱局長都應該去親身體驗吓喺的士焗桑拿嘅滋味，做吓真人騷，睇吓佢係咪捱得住嘞。