28/05/2010

播放本新聞相關短片

政情:吳清輝用剩鮮花贈太太

返埋六月尾就榮休嘅浸大校長吳清輝,呢排頻頻食餞行飯,尋日輪到同傳媒朋友話別,平日好少露面嘅吳太郭蜀華都嚟撐老公。

吳校長同太太結婚超過三十年,老婆係陶藝家,好少見報,尋日親自出馬整咗一批陶瓷擺設同飾物送畀記者,非常難得。吳校長話同太太相識於留學加國時,彼此因活躍於「中國同學會」而互生情愫。吳太講嘢風趣,更大爆老公瘀事,埋怨老公唔夠浪漫,婚後第一次收花,竟然係一束浸大用剩嘅鮮花,呢束花本來係送畀訪港冰球隊嘅,激到佢紮紮跳。

查實吳校長疼錫家人又重視家庭樂,一家三口出門去旅行,定必叫太太同囡囡唱歌畀佢聽解悶,做嘢做得攰時,又會搵囡囡幫佢按摩。佢話遊完歐洲充電後,將移居珠海做聯合國際學院(UIC)校長,外間對佢出任呢個位議論紛紛,佢直言覺得好可笑,因為佢已兼任該校校長多年,工作能力有目共睹喎!