中策集團主席馬時亨喺上禮拜五佛誕假期同兩個朋友上咗東莞海逸高爾夫球會打波聯誼，開頭打得麻麻哋，後來加緊發力，當打到第五個洞時，開波位置距離洞口約一百米，肥亨大桿一揮就一桿入洞，開心到振臂歡呼！佢好雀躍咁話，今次係佢打高球十七年嚟第一次一桿入洞。
點解咁興奮？事關一桿入洞嘅機會率為十幾萬分之一，對一個業餘球手嚟講，算係相當幸運。根據高球傳統，凡打出一桿入洞者都會請食飯慶祝，雖然當日肥亨只有兩個朋友做見證，但消息迅速傳遍政商界，好多朋友紛紛致電恭喜，好似作為波友嘅黃楚標就講明要肥亨請食飯慶祝，所以肥亨已經預咗大排筵席，時間同地點仍待定。
話時話，保險係有「一桿入洞」賠償嘅，畀球手請食飯有得幫補吓，連保險公司都肯保，證明一桿入洞係幾咁難，好似保安局局長李少光同立法會議員梁君彥就試過兩次一桿入洞，唔使講佢哋運氣好到爆晒燈！