港鐵尋日召開股東周年大會，年年都捧場嘅小股東、退休校長陳婆婆今年又出招。陳婆婆喺發問時間一開始就搶先發言，一嚟就鬧港鐵極之孤寒，冇照顧小股東嘅飲食需要，佢話：「股東會一支水都冇，人哋『八號仔』（電訊盈科）咁窮都有兩張餅卡，每張五十蚊呀！你哋（港鐵）唔好再折磨我哋啦！仲有台前點解有欄唔畀我哋上去，主席你係咪驚我上台找你麻煩，我唔係長毛喎！」
陳婆婆之後仲未夠喉，再鬧政府身為港鐵大股東，但運輸及房屋局局長鄭汝樺同財經事務及庫務局局長陳家強唔知去咗邊，搞到港鐵主席錢果豐要叫政府代表、財經事務及庫務局副秘書長梁卓文企起身畀陳婆婆睇，陳婆婆先稍微順番條氣。
雖然陳婆婆一番話搞到台上眾人不知幾尷尬，但錢果豐好有風度，大讚陳婆婆好有校長本色，又話落台之後一定要同陳婆婆握手，可惜陳婆婆冇領情，仲話：「你同我握手我一定會暈低。」