本文重點
本報早前踢爆公務員事務局喺明知可能有角色衝突下，仍然有條件批准前旅遊事務專員方舜文過檔貿易發展局做副總裁。事件仲凸顯現行規管離職高官再就業嘅制度存在嚴重漏洞，高官如果唔係因為年齡問題退休，而係自己劈炮唔撈，就毋須受到半年至一年嘅就業「禁制期」限制，因而令到方舜文同另一前高官李達志，可以喺離職後短短三至四個月，就極速過檔貿發局同金融管理局搵真銀。
報道出街後，引起唔少立法會議員關注，個別議員仲揪住方舜文唔放添！其中白鴿黨張文光會喺下月二號嘅立法會大會提出書面質詢，要求公務員事務局交代方舜文同李達志嘅申請審批詳情，並匯報過去三年一共批准過幾多唔係因為退休而離職嘅前高官，喺少於一年內轉工，以及會唔會盡快檢討呢種唔一致嘅安排。
D姐冇得側側膊
勞聯李鳳英亦會喺下月九號嘅大會就方舜文事件提出書面質詢，雖然遲咗張文一個禮拜，但英姐身兼梁展文事件專責委員會主席，由佢出手發問分量自然唔同啲。
英姐質疑雖然政府有規定方舜文喺一年之內，都唔可以喺貿發局參與同會展擴建同其他可能有潛在利益衝突嘅工作，但實際上有乜措施可以確保對方唔會咁做，以免令公眾有負面諗法，令政府尷尬同公務員形象受損呢？佢又質問政府係咪知悉貿發局特別補咗錢畀方舜文，以補償佢放棄部分有薪假期換取盡早返新工，以及有關補償係咪嚟自政府撥畀貿發局嘅資助？
張文光同英姐長期跟進公務員事務，都係好熟悉公務員隊伍同離職高官再就業制度，佢哋雙劍合璧，聯手前後腳狙擊政府，睇怕公務員事務局局長「D姐」俞宗怡都唔可以側側膊，將件事再輕輕帶過喇啩？D姐必定要就事件向公眾作出一個清晰交代！