減排不力，何來成績？國際顧問公司美世（Mercer）啱啱出爐嘅最佳生活質素城市排行榜，新加坡蟬聯亞洲第一，喺全球二百二十一個城市入面排第二十八。香港成日烏煙瘴氣，出街都要掩鼻，輸畀花園城市都預咗，但勢估唔到呢次連前五十名都唔入圍，排名第七十一，同「宿敵」新加坡比，輸足成條街。

香港唔單止藍天白雲愈叫愈走，優質生活一樣係愈叫愈走，遲早連遊客同投資者都望而卻步。嗱，排名唔係斷估o架，考慮因素包括基建、政治同社會環境以及醫療服務等。顧問公司仲斷埋症添，話港府喺減少污染同引入環保措施方面，做嘅嘢少之又少。

叮！港府搞環保一向得個噏字，口水多多，成績少少。呢次喺城市生活質素方面又再「肥佬」，唔怪得曾蔭權畀環保組織叫做「氣候逃犯」，甚至畀人哋「通緝」咯。

講到減排，煲呔曾花樣就多，不過最搞笑嘅就係同珠三角「共建優質生活圈」嘞。依家咪話同排第一嘅歐洲城市維也納比，連亞洲最佳生活質素城市都唔入流，畀人「踢出」優質生活圈，仲好意思繼續吹水？慳啲啦！

港府為推動環保做過啲乜，市民心中有數。除咗攞啲細眉細眼嘅措施出嚟敷衍吓輿論同市民，做一兩場騷應酬吓環保團體，實質性嘅嘢冇做幾多。最具爭議嘅，莫過於一攞出嚟就畀人炳到七彩嘅停車熄匙「苛政」，唔單止效果成疑，更因為實施起嚟根本行唔通，隨時會引起執法人員同司機嘅爭拗，除咗添煩添亂，一無是處。

仲有膠袋稅，你話啲錢收番嚟用於推動環保，市民條氣都順啲。每季收約六百萬膠袋稅入晒庫房，點用冇人知，淨係見當局明明有平靚正嘅港產電動車MyCar唔買，寧願畀多幾倍價錢買日本電動車，咁搞環保簡直嘥氣。環保署最新數字顯示，首階段膠袋徵費實施將近一年，但每季派發嘅徵費膠袋並唔見有下跌趨勢，效果係點，唔使問嘞啩。

本港環保困局四個字講晒，就係內憂外患，車輛係污染源頭，但當局冇對症下藥，淨係做埋停車熄匙呢啲門面工夫；珠三角工廠排污，港府既冇膽又冇力做嘢，索性翹埋雙手，乜都唔做。

據講最佳生活質素城市排行榜係為跨國公司向海外派駐僱員提供參考，計太一叮話齋，香港空氣質素愈來愈差，喺度做嘢等同搵命博，唔怪得外籍僱員個個走夾唔抖，有去冇回頭啦。叮！