小白觀點：署長扮潮不如買A貨

創新科技署新任署長王榮珍新官上任，講到明用手提電話要新款iPhone，原因係「工作需要」。我覺得呢個理由都幾成理由㗎，人哋堂堂創新科技署揸Fit人，冇理由仲拎住部水壺摺龜啩，查實依家買iPhone只係用嚟玩，邊度有需要吖，最怕係遲吓學生哥可能同阿媽講，因為「學業需要」買番部；女朋友可以同男朋友講，因為「拍拖需要」；隻狗仔吠兩聲，狗主都要心領神會係「散步需要」，快啲喺狗狗頸環掛番部。

唔好話我話，新阿姐都未識用晒啲功能，其實都係想扮潮啲啫，既然係咁，不如平平哋去深圳華強路執番部A貨，只係幾百蚊，個樣都呃得吓人㗎。不過擔心嘅係，到時政府物料供應署可能派成班大帝北上搵電話，因為「工作需要」要去揼骨大吃大喝，埋單一計，一部老翻可能要幾萬蚊都唔奇。

Email：sunsiupak@gmail.com

Blog：http://sunsiupak.blogspot.com

阿豪觀點：「工作需要」得啖笑

政府又被本報揭發「大花筒」，大家睇吓班高官竟然用公帑報數買乜嘢，真係嚇大家一跳。好似創新科技署署長王榮珍咁呀，竟然以「工作需要」為由，要求署方出一部新款iPhone畀佢。

表面上，新款iPhone手機好似開正創新科技署嗰瓣，但係細心諗一下，你話王榮珍係科學家就話啫，起碼佢有能力拆開部iPhone，然後用更低成本砌部類似嘅嘢，之不過王小姐係政務官，用就或者會識用！

除咗創新科技署，其他被踢爆亂花錢嘅部門仲有稅務局、運輸署同電訊管理局等，咪以為只係買吓傢俬，講緊只係幾萬蚊好小事喎，你睇吓人哋英國國會啲議員，之前都爆咗好多亂花公帑醜聞，甚至有人申報貓狗糧，結果搞到工黨同保守黨都雞毛鴨血，間接益咗自民黨呢股第三勢力，你話幾咁大鑊呢！

Email：lukchiho75@hotmail.com

Blog：http://lukchiho.blogspot.com

網友觀點……

阿呆：工作時需要用iPhone幾咁好呀！可以睇片、聽歌！

睇開啲：花成億公帑搞補選都係咁啦，唔使就笨！

老趙：署長想研究部嘢幾巴閉，創新功能夠唔夠多啫。

大雄：王署長使唔使學煲呔曾咁整多部iPad添呢？