李醫生今次係以亞太區家庭醫學會會長身份過去墨西哥開家庭醫學會議，今次過去，不但打定流感針，仲打埋肝炎針預防添。墨西哥菜式唔係人人啱食，為防水土不服，李醫生仲預備咗「三乾一水」，三乾係餅乾、豬肉乾同牛肉乾，水唔使問都知係講乾淨食水啦。講起今次旅程，李醫生話會好辛苦，無啖好食之外，仲要坐成廿幾個鐘頭飛機，可以稱得上係減肥之旅。