赤柱冧樹死人後，掌管超級大局嘅發展局局長林鄭月娥就接咗全港樹木管理呢個燙手山芋，尋日佢喺立法會回覆議員質詢，首次以「樹后」身份、洋洋灑灑咁答咗幾千字，講得最多嘅係各種各樣嘅規管方法，整個回覆中，佢提及向轄下部門及其他政府機構、全港物業管理公司發出及要檢討嘅指引就最少有五、六個，唔通樹后管樹嘅撒手鐧就係指引﹖
樹后喺回覆中話，綠化、園境及樹木管理組今年三月成立後，其中一個工作就係為樹木管理做標準同良好作業方法，佢個局轄下嘅工務科早前已發出內部指引，訂明補償種植樹木嘅數量等，小組成立後先會檢討呢啲指引，仲整多份指導政府人員識別樹木狀況嘅指引，佢哋仲會制訂一套完備嘅樹木護養標準，又會向全港業主立案法團、物業管理公司等，發一套修剪樹木嘅指引等……講嚟講去都係指引。
全港樹木千千萬萬，當初林鄭接管樹呢項工作時，都有唔少人擔心呢個工作太細緻，事隔一年，林鄭首次公布佢嘅管樹大計，得唔得﹖睇怕最少要一年後至知，不過，呢個夏天嘅大風大雨可能係第一個考驗！